Adriana Rezzele: Che bela la mé contrada
Che bela la mé contrada
de sera tardi
quando ié tuti in leto.
Quando la dorme,
la gente l’è tuta precisa,
come quando se magna o quando se nasse
e quando se more.
La luna sta sera l’è picola e sconta.
Vardo le case co’ le luce smorsè
ié chiete, le sponsa anca lore.
Ié come de le cune
che ten la gente al caldo,
le ne varda fin che dormemo,
e le pensa:
adesso sì tuti ‘stessi!
Quando se dorme, ci sa in do nemo?
L’anima la se mola e la vola,
la va a sanarse da le nostre miserie,
dai nostri dispiaseri, da le cativerie
e dai bruti pensieri.
Par tornar piena de forsa e passiensa,
che a la matina se sveia
la doneta, l’ometo e la butina.
La ga el so da far a tignerne in sesto fin sera.
Ancò, doman e avanti avanti
fin che saremo noaltri a nar con ela.
Liberi da le miserie e dai dispiaseri.
Category: Arte e Poesia, Osservatorio comunità montane
